हेटौंडामा स्कुटर दुर्घटना, तीन जना घाइते

हेटौंडा ।  हेटौंडा उपमहानगरपालिका–४ फरेष्टी क्याम्पस अगाडि बुधबार (हिजो) साँझ स्कुटर दुर्घटना हुँदा तीन जना घाइते भएका छन्।कर्रा बाट हेटौंडा बजारतर्फ आउँदै गरेको बा.प्र.०३–००५ प ९८८५ नम्बरको स्कुटरले बाटो क्रस गर्दै गरेको पैदल यात्रीलाई ठक्कर दिदा दुर्घटना भएको बागमती प्रदेश प्रहरी कार्यालय हेटौंडाले जानकारी दिएको छ । ठक्करबाट पैदल यात्री हेटौंडा उपमहानगरपालिका–४ निवासी २९ वर्षीय दिजुनाथ सिद्धको दुवै हात, दुवै घुँडा र टाउकोमा चोट लागेको छ। उनको अवस्था मध्यम रहेको जनाइएको छ।

 

दुर्घटनामा स्कुटर चालक हेटौंडा–१२ आँपधाप निवासी प्रदिपराज घलेका १७ वर्षीय छोरा प्रज्वल घले गम्भीर घाइते भएका छन्। उनको दुवै हात, घुँडा र अनुहारमा गम्भीर चोट लागेको छ र बोल्न नसक्ने अवस्थामा रहेका कारण थप उपचारका लागि उनलाई राति ९ः१५ बजे भरतपुर रिफर गरिएको प्रहरीले जनाएको छ। त्यस्तै, स्कुटरको पछाडि सवार हेटौडा–१२ निवासी शिवराज गोलेका १५ वर्षीय छोरा अस्मिन गोले सामान्य घाइते भएका छन्। उनको दुवै हात, घुँडा र टाउकोमा सामान्य चोट लागेको बताइएको छ। घाइते सबैलाई तत्काल उपचारका लागि हेटौंडा अस्पताल पुर्‍याइएको थियो । प्रज्वल घलेलाई भरतपुर रिफर गरिएको भए पनि पैदल यात्री दिजुनाथ सिद्ध र स्कुटर पछाडि सवार अस्मिन गोलेलाई उपचारपछि अस्पतालबाट डिस्चार्ज गरिएको जनाइएको छ।