प्रो क्लब च्याम्पियनसिप क्रिकेटमा ६ टोली, पर्सा ११ र युपी ११ बीच उद्घाटन खेल हुने
पालिका संचारकर्मी काठमाडौं । प्रो क्लब च्याम्पियनसिपको उद्घाटन खेलमा घरेलु टोली पर्सा एघार र भारतीय टोली युपी एघार बीच प्रतिस्पर्धा हुने भएको छ ।
जोहरा इन्टरनेशनलको आयोजना तथा पर्सा क्रिकेट संघको समन्वयमा हुने यही डिसेम्बर २१ देखि ३० सम्म प्रतियोगितामा नेपाल र भारतका गरी कूल ६ टोलीको सहभागिता हुनेछ ।
आयोजकले शनिवार सार्वजनिक गरेको तालिका अनुसार पहिलो दिन उद्घाटन खेलसहित दुई खेल हुनेछ । अर्को खेल आर्मी र नेपाल पुलिस क्लबबीच हुनेछ ।
टी-२० फर्म्माटमा खेलाइने प्रतियोगिता पर्साको वीरगंजस्थित नारायणी क्रिकेट मैदानमा हुनेछ ।
प्रतियोगितामा नेपालका तीन विभागीय टोली आर्मी, पुलिस र एपीएफसहित पर्सा एघार तथा भारतको युपी एघार र वन्डर्स क्लब नोइडाले प्रतिस्पर्धा गर्नेछन् ।
सिंगल राउण्ड रोविनको खेलपछि शीर्ष चार टोली सेमिफाइनलमा प्रवेश गर्नेछन् । जहाँ लिगमा पहिलो र चौथो हुनेबीच पहिलो सेमिफाइनल हुनेछ र दोस्रो र तेस्रो हुने टोलीबीच दोस्रो सेमिफाइनलमा हुनेछ ।
प्रतियोगितामा कमेन्ट्री गर्न अष्ट्रेलियाका चर्चित कमेन्टेटर तथा क्रिकेट पत्रका मेलिन्डा फारेल आउने भएकी छन् ।
