विद्यालय सुधारमा संघ–स्थानीय समन्वय बढाउने तयारी, भर्ना र शुल्क विवादबारे उच्चस्तरीय छलफल हुँदै

काठमाडौं — विद्यालय क्षेत्रमा देखिएका भर्ना र शुल्कसम्बन्धी विवाद समाधान गर्न संघीय सरकार र स्थानीय तहबीच समन्वयलाई थप प्रभावकारी बनाउने तयारी गरिएको छ।

यसै सन्दर्भमा शिक्षा, विज्ञान तथा प्रविधि मन्त्रालय ले काठमाडौं उपत्यकाका स्थानीय सरकारका प्रमुख तथा सरोकारवालासँग उच्चस्तरीय छलफल आयोजना गर्न लागेको जनाएको छ। सिंहदरबारमा सोमबार हुने उक्त छलफलमा शैक्षिक सत्र सुरु हुने पूर्वसन्ध्यामा देखिएका अन्योलता समाधान गर्ने लक्ष्य राखिएको छ।

छलफलमा विद्यार्थी भर्नाको समय, निजी विद्यालयले लिने शुल्क, वार्षिक शैक्षिक क्यालेन्डर तथा आगामी रणनीतिबारे विस्तृत बहस हुने बताइएको छ। विशेषगरी केही संस्थागत विद्यालयले मापदण्डविपरीत शुल्क असुल गरेको र समयअघि नै भर्ना सुरु गरेको गुनासो बढेपछि सरकारले चासो देखाएको हो।

बैठकमा शिक्षामन्त्री सस्मित पोखरेल, काठमाडौं महानगरपालिकाकी कार्यवाहक प्रमुख सुनिता डंगोल, ललितपुर महानगरपालिकाका प्रमुख चिरिबाबु महर्जन लगायत सहभागी हुनेछन्। साथै नेपाल नगरपालिका संघ र गाउँपालिका राष्ट्रिय महासंघ का प्रतिनिधि तथा गृह र शिक्षा मन्त्रालयका उच्च अधिकारीहरू पनि उपस्थित रहनेछन्।

यसअघि मन्त्रालयले गैरकानुनी रूपमा असुल गरिएको शुल्क फिर्ता गर्न निर्देशन दिइसकेको छ। संघीय सरकार र स्थानीय तहबीच भर्ना मिति र पठनपाठन सुरु गर्ने समयमै असमझदारी देखिएपछि समन्वय आवश्यक भएको निष्कर्ष निकालिएको हो।