महिनामा दुईपटक महिनावारी किन हुन्छ? कारणदेखि समाधानसम्म

महिलाहरूको मासिक स्वास्थ्यसँग सम्बन्धित विषयमा कहिलेकाहीँ देखिने अनियमितता सामान्य हुन सक्छ, तर बारम्बार दोहोरिँदा ध्यान दिनुपर्ने चिकित्सकहरूले बताएका छन्। महिनावारी एक प्राकृतिक प्रक्रिया भए पनि यसको चक्रमा आउने परिवर्तनले शरीरको आन्तरिक अवस्थाबारे संकेत दिन सक्छ।

सामान्यतया महिनावारी चक्र २८ दिनको मानिन्छ भने २१ देखि ३५ दिनसम्मको अन्तरलाई पनि सामान्य नै मानिन्छ। तर चक्र छोटो हुँदा एकै महिनामा दुई पटक महिनावारी भएको जस्तो अनुभूति हुन सक्छ। तनाव, खानपानमा परिवर्तन वा निद्राको कमीले पनि चक्र प्रभावित गर्न सक्छ।

चिकित्सकहरूका अनुसार हर्मोनल असन्तुलन यस्तो अवस्थाको सबैभन्दा सामान्य कारण हो। साथै पोलिसिस्टिक ओभरी सिन्ड्रोम, पाठेघरमा हुने फाइब्रोइड तथा थाइराइडसम्बन्धी समस्या पनि महिनावारी अनियमिततासँग जोडिन सक्छन्।

यदि यो समस्या बारम्बार देखिन्छ, अत्यधिक रक्तस्राव हुन्छ, वा कमजोरी र चक्कर आउनेजस्ता लक्षण देखिन्छन् भने यसलाई बेवास्ता गर्नु हुँदैन। यस्तो अवस्थामा दीर्घकालीन रूपमा रक्तअल्पता जस्ता समस्या पनि देखिन सक्छन्।

विशेषज्ञहरूले यस्तो अवस्थामा समयमै चिकित्सकसँग परामर्श लिन, सन्तुलित आहार अपनाउन, नियमित व्यायाम गर्न र तनाव व्यवस्थापनमा ध्यान दिन सुझाव दिएका छन्। शरीरका परिवर्तनलाई समयमै बुझ्नु नै दीर्घकालीन स्वास्थ्यका लागि महत्वपूर्ण मानिन्छ।एजेन्सी